Tinanggihan muli ng Sandiganbayan ang apela ni dating Quezon City Mayor Herbert "Bistek" Bautista na mapayagan itong makapagsampa ng 'demurrer to evidence' para mapadali ang pagdismis sa kanyang kasong graft.
Sa 14-pahinang resolusyon na naipalabas noong April 8, pinagtibay ng Sandiganbayan 7th division ang March 8 resolution na umisnab kay Bautista at kapwa akusado na si dating QC city administrator Aldrin Cuña na aksyunan ang motions for leave para makapagsampa ng 'demurrer to evidence'.
Ang 'demurrer' ay maaaring maging daan na payagan si Bautista at Cuña na makuha ang dismissal ng kanilang graft case kahit walang naipiprisintang depensa at sesentro lamang sa posibleng paghina ng ebidensiya laban sa kanila na naiprisinta ng prosecution panel ng Office of the Ombudsman.
Ayon sa Sandiganbahan 7th division, bigo si Bautista na maipakita ang anumang meritorious argument sa kanyang motion for reconsideration na magiging daan para sa reversal ng March 8 resolution.
"As pointed out by the prosecution, the filing of accused's motion for reconsideration only serves to stall the proceedings," ayon sa graft court.
"What is clear, therefore, is that trial must proceed following the denial of the motion for leave to demur to the evidence. Consequently, on this technical ground alone, the motion should be denied," dagdag pa ng graft court .
Wala ring merito na nakita ang 7th Division sa argumento ni Bautista na busisiin ang probative value ng bawat ebidensiya na naiprisinta ng prosekusyon bago magdesisyong tanggihan ang mosyon na makapagsampa ng 'demurrer'.
Sa March 8 resolution ng 7th division ng Sandiganbayan, pinagtibay nito na sapat ang ebidensiya ng prosekusyon para maidiin ang dalawang opisyal sa kaso.
Noong March 2023 kinasuhan ang dalawang opisyal sa Ombudsman ng kasong graft dahil sa pagbabayad ng P32.108 million sa Geodata para sa "Online Occupational Permitting and Tracking System" project.
Ayon sa Ombudsman, pumasok sa kontrata si Bautista sa Geodata at inaprubahan ang pagpalalabas ng kabayaran sa kompanya kahit walang specific budget appropriation ordinance ang QC council.
Sa halip, pinirmahan ni Cuña ang Purchase Request at Obligation Request para maipalabas na dumaan sa proseso ang pagpapalabas ng pondo.
Nilinaw ng Ombudsman na nabayaran ng buo ang Geodata kahit hindi natapos ang proyekto.
MICHAEL DINGLASAN - HN INVESTIGATIVE REPORTER
No comments:
Post a Comment