BINALOT NG KONTOBERSIYA ANG RAID NG DILG‑SPECIAL PROJECT OFFICE SA PASAY KTV BAR

Headlines Ngayon

June 8

Binalot ng kontrobersiya ang nangyaring raid ng mga awtoridad sa isang bar sa Pasay City bago maghating-gabi noong Biyernes matapos ang mga naglabasang ulat sa umano'y palpak na raid.

Pumutok ang kontrobersiya dahil sa maraming katanungan sa pamamaraan ng pagsalakay ng mga miyembro ng Special Project Office ng Department of Interior and Local Government (DILG) sa King & Queen Bar sa Macapagal Boulevard na lihis sa panuntunan sa pagsagip sa sinasabing mga biktima ng human trafficking.

Sa naturang pagsalakay, wala umanong kasamang mga tauhan ng Women and Children's Protection Desk (WCPD), Inter-Agency Council Against Trafficking, at kinatawan ng Department of Social Welfare and Development (DSWD) ang raiding team na kabilang sa panuntunan sa pagre-rescue ng mga biktima ng human trafficking.

Mahigit sa 80 mga customer, ilan dito ay mga dayuhang Chinese ang kinalap ng mga pulis at mahigit 70 mga babae at lalaking kawani, tatlo umano dito ay mga menor-de-edad na pawang biktima umano ng human trafficking ang nailigtas kaya't kinailangan nilang magpasaklolo sa Pasay Police Station dahil sa dami ng mga kinalap na mga customer at kawani.

Gayunman, lahat ng mga kinalap na customer at mga kawani na sinasabing nailigtas mula sa human trafficking ay pinawalan din kalaunan at isa man ay walang na-rescue o nasampahan ng kaso dahil lahat ay may naipakitang health, dental at mayor's permit, bukod sa wala ring napatunayan na may menor-de-edad.

Sa panayam ng mga mamamahayag sa siyam na mga lalaking masahista sa bar, noon lang daw nila naranasan na mistula silang mga kriminal na pinadapa, tinutukan ng baril, iginapos ng plastic na tali, binasahan ng Miranda Rights, at kinuhanan ng mug shot.

Pahayag pa ng mga kawani, lahat sila, pati ang mga customer, ay kinuha ang mga personal na gamit kasama ang wallet at cellular phone at pinagbawalang tumawag, kumuha ng larawan o mag-video sa kaganapan.

Sa ngayon, nagsumite na si Atty. John Louie Cabral, abogado ng bar, kay DILG Secretary Benhur Abalos upang iparating ang pangyayari sa paniwalang hindi kukunsintihin ng kalihim ang nasabing uri ng raid.

Inihahanda na rin ng abogado ang mga kasong isasampa laban sa mga opisyal at tauhan ng raiding team.

ANGHEL MIDRERO - HN NEWS CORRESPONDENT