Inatasan ng Presidential Anti-Organized Crime Commission (PAOCC) ang Anti-Money Laundering Council (AMLC) na i-freeze ang mga ari-arian ng Lucky South 99 at ng iba pang assets ng mga nasa likod ng operasyon ng scam hub sa Porac, Pampanga.
Sa inilabas na Memorandum ni Executive Secretary Lucas Bersamin na siya ring Chairman ng komisyon, inatasan nito si AMLC Director Matthew David na tingnan batay sa mga nakuhang ebidensiya ang mga assets na maaaring isailalim sa freeze order.
Lumitaw sa imbestigasyon ng PAOCC at ng Provincial government ng Pampanga na walang permit ang Lucky South 99 para mag-operate at lalong walang permiso mula sa lokal na pamahalaan ng Porac.
Natuklasan ng PAOCC sa ginawang pagsalakay sa POGO hub na pugad ito ng scam farm kung saan maraming mga dayuhang Chinese at ilang Asyano kabilang na ang mga Pilipino na nagtatrabaho sa lugar, ang iba ay nakaranas ng torture kapag hindi umano naabot ang kanilang quota sa kanilang scamming scheme.
Iniutos na rin ng Department of Justice sa Bureau of Immigration na ilarga ang summary deportation sa mga nahuling POGO worker na ilegal na nagtatrabaho sa bansa.
Sa kanyang memorandum, binanggit ni Bersamin na umaabot sa 156 foreign nationals na nasakote sa Porac raid ang kailangang sumailalim sa deportation proceedings.
"This shall not in any way cover the individuals identified and recommended for criminal prosecution by concerned law enforcement agencies," ani Bersamin.
CALOY CARLOS - NEWS CONTRIBUTOR
No comments:
Post a Comment